Fólkið sem var strokið með fegurðarklútnum

2009-02-04T13:56:00.002+01:00

Jæja gott fólk og Mæja

Það sem helsta sem hefur drifið á daga mína er að ég er byrjuð aftur í skólanum eftir pásu í haust og stefni á að klára í vor, það er áfangana. Það kom aðeins babb í bátinn þannig að ég get ekki klárað ritgerðina mína, reyndar þarf ég að finna mér annað til að skrifa um, skemmtilegt, og skila henni vonandi um áramótin 2009/2010. Þetta er það helsta sem er að frétta af mér námslega séð.

,,Ungur í anda" þessu er stundum slengt fram í algjöru kæruleysi og af fólki sem veit í raun ekki alvöru merkingu þess, ég fékk þessa tilfinningu í gær, eða öllu heldur ég var 6 ára í svona 20 mín í gær algjörlega óvart.
Þannig var að ég var að labba í skólann eftir ágætis hádegismat en ég ákvað að fara í kuldagalla þar sem það var um -12°C. Allt í góðu með það og mér var ekkert kalt á leið minni í skólann, bjartsýn og jákvæð til að hefja kennslustund í Eigin rekstri. Þegar ég ætlaði að klæða mig úr gallanum í fatahenginu þá kom upp vandamál, ég gat ekki rennt niður því að rennilásinn hafði fests innan frá eins og gerist stundum. ,,þetta er nú ekki mikið mál" hugsaði ég með mér og ákvað að kippa hressilega í rennilásinn en með þeim afleiðingum að það hertist frekar á takinu og nú var enn verr að losna úr gallanum góða. Ég hamaðist og hamaðist var orðin ennþá rauðari í framan þar til ég gafst upp og þurfti að biðja konu um að hjálpa mér, sem og hún gerði. En við púuðum og andvörpuðum en þetta gekk afskaplega hægt. Ég eldrauð í framan eftir gönguna, með nefrennsli út af frostinu og í kuldagalla eins og börn að láta konu hjálpa mér með rennilásinn... mér leið eins og 6 ára, það vantaði bara að ég væri með sand í munninum.
En þetta er allt í lagi því að kennarinn minn labbaði AÐEINS tvisvar sinnum framhjá mér í vandræðum mínum.

Næst á dagskránni er afmælisvikan mín og ´80 ball á fimmtudaginn 5. febrúar, jejejeje, og ég er komin með búning. Ef til vill koma myndir inn af því... kannski

kveðja Birta gengin í barndóm

(-12°C, heiðskýrt. NA 5 m/s)

Að loknu sumri

2008-10-23T16:51:00.002+02:00

Sælir lesendur góðir, þeir sem eftir eru.....
Eitthvað er búið að vera að jagast og tuða í okkur vegna bloggleysis, en bendum við á heimasíðu Mæju um allar sögur af síðastliðnu sumri og það sem af er hausts.... Þannig við segjum bara Mæja, you go girl og vonumst til þess að hún haldi áfram að gera góða hluti.
Kveðja Helga og Birta
ágætis veður, en gengur á með helvítis hryðjum og viðbjóði.

Sumarfrí

2008-05-19T00:59:00.012+02:00

Jæja þá er enn einn viðburðarríkur vetur að baki og ,,sumarfríið" hafið með blóm í haga og það allt saman.

Annars er ég ósköp fegin að skólinn er búinn, var farin að finna fyrir svokölluðum námsleiða svona um eða uppúr septembermánuði, en ég lifði þetta allt saman af.

Á morgun byrja ég að vinna og það verður æði. Ég hef fengið nýjan vinnufélaga þar sem að Birta ákvað að leyfa Syðstu-Fossa búinu að njóta starfskrafta sinna þetta sumarið. Nýji vinnufélaginn er nú ekki af verri endanum, en það er hún Mæja sem allt getur og ég hef trú á því að hún eigi eftir að veita mér einhverja skemmtun og gleði í sumar eins og svo oft áður (Gísla leist meir að segja vel á hana, þá hlýtur hún að vera æði).

Skelli inn tveimur myndum af Skvísu í tilefni dagsins þar sem hún er búin að slá öll óþekktarmet og láta eins og guð sé löngu búin að gleyma henni.........blessuð skepnan

Svo mikil dama....

....og í ærslafullum leik

kv. Helga María, handlagna

Skýjað en hlýtt og milt veður og 7°C

2008-04-10T12:21:00.003+02:00

Gott fólk

Nú er komið að þessu, á meðan flestir eru að hamast við sveittir að klára BcS ritgerðina sína (það er bekkjarfélagir mínir) er ég að bora í nefið og er komin á nýjar lendur í þeim málum. Fyrir þá sem ekki vita þá mun námi mínu seinka lítillega þar sem mér finnst svo óheyrilega gaman hér:)

Nú er sumarið komið og hrossagaukurinn til landsins þá dríf ég mig í kjól, hleð niður franskri músikk og dilla mér í takt, ég má það. Lömbin fara að koma og ég fer að fara til Ástralíu til að heimsækja Dísu mína og uppáhalds mág. Þeir sem vilja kynna sér lífshætti þeirra þarna niður frá geta farið á ,,downunder.bloggar.is"

Ég er ekki sú eina frá Gullberastöðum sem er að leggja land undir fót. Móðir mín er að fara ásamt fríðu föruneyti til Jemen og Sýrlands held ég, eitthvað á þessar slóðir, til þess að synda í Dauðahafinu með miðaldra konum og annað uppbyggilegt. Sjáum nú til hvort hún kemur lifandi frá því ferðalagi.

Annað er ekki á döfinni nema þá helst að ég er að fara að vinna eftir prófin en ég verð að vinna hjá bróður mínum Unnsteini, sem aumkaði sér yfir vesalinginn mig, ætli maður reyni ekki að gera sitt besta til þess að standa sig.

kveðja Birta á faraldsfæti

(NA 8m/s 3°C sólarglenna en kalt)

Rúni Júl

2008-04-04T15:16:00.009+02:00

Má til með að skella hér inn nokkrum myndum af okkur stöllum, því enn er frægt fólk að bætast við á bestravinalistann (og þá á ég við fólk eins og Geirmund Valtýsson, Helgu Möller og fleiri heimsþekkta tónlistarmenn og skemmtikrafta).

Nýjasti meðlimurinn er ekki að verri endanum og eins og sjá má af þessum myndum hefur karlinn engu gleymt og var uppá sitt allra besta á þorrablóti Lunddælinga.....

Kata (betur þekkt sem Kata bílasali) tók lagið með Rúnari og þvílíkan samhljóm hefur maður sjaldan heyrt, það var eins og þau væru búin að spila saman í 40 ár, Simon og Garfunkel hvað! segi ég bara......

Við gátum að sjálfsögðu ekki sleppt því að fá eiginhandaráritun hjá kauða. Eitthvað var orðinn langur tími síðan hann fékk síðast slíka beiðni frá unglingsstúlkum í geðshræringu, setti upp undrunarsvip og sagði svo ,,Í alvöru?", jú auðvitað viljum við fá eiginhandaráritun. Birta rífur bolinn niður og Rúni réði sér vart fyrir kæti ,,Eru´ði ekki að grínast?".....

En eins og sjá má af þessari mynd varð Rúni við þessari ósk okkar og bar sig einkar fagmannlega að eins og sjá má á því hvar vinstri hönd hans er staðsett......

Gleðin og spenningurinn var nær óbærilegur að komast í kynni við svo frægan mann og auðvitað var mynd smellt af til sönnunar þessum sögulega viðburði

Hér má svo sjá afrakstur kvöldsins..............

Seinna um kvöldið var svo drukkið frá sér allt vit og dansað af sér rassgatið og fengu Lunddælingar fullt hús stiga fyrir góðan mat, gott ball og frábæra skemmtun.

Kveðja Helga María, baðar sig í frægðarljóma

Sól og heiðskýrt, 0°c

Snjór og grill

2008-03-09T23:18:00.007+01:00

Gott fólk
þennan stórkostlega dag (9. mars) þá átti sköpunargleðin hug minn allan

eins og myndirnar sýna....

Eins var grill á Árgarði föstudagskvöldið og var þar iðkað óhóflegt át og drykkja

Hér má sjá Mæju að fíra upp í grillinu

Sigurliðið í trivial.... hógværir sigurvegarar??

ekki meir í bili

Birta, leir/snjór í mótun
(-3°C, snjókoma, logn)

Fögnum, Íslendingar

2008-03-01T16:38:00.003+01:00

Fyrir 19. árum þennan dag fékk hinn gyllti mjöður velþóknun stjórnvalda til þess að nema hér land.

Fögnum, drekkum, fögnum öll sem eitt

Bruggarar

(-5°C, logn, sól)

enn af afmælum

2008-02-14T10:19:00.003+01:00

Gott fólk
Eins og alþjóð veit þá hélt ég upp á afmælisvikuna mína um daginn (1-9. feb) enn er ég ekki búin að fá gjafir frá öllum en ég er tilbúin að fyrirgefa þessa yfirsjón ef þær berast til mín innan febrúarmánaðar 2008.

Sjálfan afmælisdaginn 9. febrúar var ég ekki heima við en ég þorði ekki að aulgýsa það í blöðum þar sem ég veit að það eru til glæpamenn sem nýta sér þess lags upplýsingaflæði og brjótast inn er húsráðendur eru að heiman. Ég var sem sagt í Þingeyjasýslu hjá mínum heittelskaða á Litlu- Reykjum. Þar var haldið þorrablót og gekk það vel, alls ekki vitlaus samkoma. Ég fékk samt nett sjokk um daginn eða seinni partinn og fór að hugsa hvar ég væri stödd þar sem ég var við eldhúsborðið á Litlu-Reykjum og var að drekka Grand með mömmu og ömmu hans Valþórs. Þessi stund var svona vendipunktur í mínu lífi líkt og sú stund sem ég fór að versla gluggagardínur. Ég hraðaði í mér snafsinum og fór síðan að gera eitthvað töff og unglegt.

Þær afmælisgjafir sem ég fékk voru breytilegar en mest megnis góðar þar má nefna rauðvínsglös, hálsfesti með nafninu mínu á, peysu, útvarp, töfratyppi og annað gott og vel nýtanlegt, takk fyrir mig. þegar ég er búin að taka myndir af þessu þá mun ég láta þær hér inn ykkur til yndisauka.

Annað hefur ekki gerst enda myndi það falla í skuggan af afmælisvikunni minni, nýja íbúðin stendur undir sínu og er öllum velkomið að líta við í höllina.

Þar til síðar, lifið heil
Birta ávallt grand

(11°C, sunnan 10m/sek og það rignir)

Afmæli og fleira skemmtilegt

2008-01-27T18:29:00.000+01:00

Sælir lesendur nær og fjær

Margt hefur á daga okkar drifið síðustu vikur og ber þar helst að nefna...

Stórbrotið afmæli mitt þar sem mikið var um dýrðir líkt og vanalega. Ég bauð mannskapnum upp á kjötsúpu líkt og árinu áður og var hún étin með bestu lyst...

Kjötsúpan rann ljúflega ofan í afmælisgestina

Auk þess fékk ég fjölmargar fallegar gjafir og ber þar helst að nefna...vín, ilmkerti, diskókúlu, Bart Simpson grímu, júgur (plast), lúffur, gjafabréf uppá 1000 ml af gæðamiði sem útleystur verður á vordögum, Thule húfu og fjölmargt annað fallegt

Thule húfan góða

Helgina 19-20 janúar fór svo hópur fríðleiksfólks í ferðalag með hinu víðfræga hrútavinafélagi á Strandir, Dali og Kolbeinstaðahrepp. Ég ákvað að vera bara heima og læra, en það gekk reyndar ekki betur en svo að þegar ég var búin að gráta úr mér augun af öfund allan laugardaginn fékk ég til liðs við mig tvo vaska sveina og við keyrðum vestur í dali og hittum ferðalangana og ég eyddi svo sunnudeginum með þeim og fékk minn skerf af drykkju og ferðalagi. Það var nú gott...

Birta og Mads á góðri stund

Ég og Lilja eldhressar

Hópurinn fylgist með af áhuga

80´s ball var svo haldið síðastliðinn fimmtudag. Allir skemmtu sér vel og fátt annað um það að segja og læt ég því myndirnar tala sínu máli...

Ég og Mads

Mæja og Mads sýndu af sér mikla kæti

Silja, Birta og Valþór bregða á leik

Meðleigjendur mínir voru einnig mjög hressir og kynþokkinn var í fyrirrúmi

Að lokum er hér myndband sem ég vona að þið hafið eitthvert gagn af og einnig nokkur gaman.

Góðar stundir.....

Mæju færi ég mínar bestu þakkir fyrir hjálpina við gerð myndbandsins og fyrir lánið á myndunum sem ég hef hef birt hér að ofan... Mæja þú ert æði

kv. Helga María.....næstum því 25

Rok, rigning og umfram allt leiðindaveður.

einn dagur í einu...

2008-01-12T21:38:00.002+01:00

Gott fólk, gleðilegt ár og svoleiðis

Þrátt fyrir fyrirheit auglýsinganna um betri tíð á nýju ári þá byrjar árið ekki vel. Endurtektarpróf hjá mér í dýrafræði hryggleysingja, sem ég náði (vei) og þau harmartíðinda var Helga að færa okkur um að hún er búin að þjást af anorexíu síðustu 4 ár.

Ég er harmi slegin en harðákveðin í að standa með henni í þessum veikindum og treysti á því að þið, allir vinir hennar, standið með henni á þessum myrku tímum með von um að samhugur vina hennar hjálpi að flytja hana í átt að ljósinu.

Lifið vel og Helga þú ert ekki ein

(Logn, -6°C)

Belís heilsuvörur

2007-11-05T12:38:00.000+01:00

Þá getur maður loks tekið gleði sína á ný....

Nýi bæklingurinn er kominn í hús og vöruúrvalið er ekki að verri endanum frekar en vanalega. Þeir sem eru farinr að velta fyrir sér jólagjafainnkaupum ættu ekki að óttast, því hjá Belís heilsuvörum er geta allir fundið eitthvað fyrir sitt hæfi.......og á viðráðnlegu verði.

Sem dæmi langar mig að nefna:

12 bómullarnærbuxur með áprentuðum blómum.

Valentínusar sett fyrir ástfangin pör. ,,Settið samanstendur af tveimur bollum, einum fyrir hana og einum fyrir hann ásamt litlum og sætum púða með setningunni I love you. Einning er fallegt kvartsúr með bleikri skífu"

Unaðargel fyrir konur sem vilja betra kynlíf. ,, Samlífið mun færa þér áður óþekktan unað og ánægju. Þetta hreina gel er með öllu hættulaust"

Gigaman stinningarlyfið. ,,Gigaman fyrir betra og unaðslegra kynlíf"

Bandex úthaldskrem fyrir karlmenn. ,,Þegar leikurinn stendur stutt jafnvel aðeins í nokkrar sekúndur er ánægjan minni. Vanlíðan og vonbrigði geta fylgt. Treystu á Bandex til að fyrirbyggja vonbrigði. Íslenskar leiðbeiningar fylgja"

Glæsilegur 3ja hæða kökudiskur.

Fallegur lampi með ilmúðara. ,,Settu lampann í samband við innstungu og hann mun lýsa rómantísku ljósi, en hann er einnig fallegur ilmúðari."

Hrífandi eau de perfume. ,,Hjartalaga, mjög elegant flaska með ferskum ávaxtailmi. Fyrir nútímakonuna."

Sindrandi brjóstnæla- eða hálsfesti-úr með kristöllum. ,,Þetta er brjóstnæla og hálsfesti saman í einstæðri og smágerðri gauksklukku. Þú getur borið þetta sem brjóstnælu og einnig sem hálsfesti."

Taska með regnhlíf og veski. ,,Nýtískuleg handtaska gerð úr djúpbláu bútasaumsleðri. Þrjú mismunandi hólf með rennilás og sérstöku hólfi fyrir regnhlíf sem fylgir með sem kaupbætir. Þú ert þessvegna alltaf tilbúinn ef það skyldi nú fara að rigna."

auk segularmbands til að bæta blóðrásina, límabandi sem límir allt, þoku og ljósvarnargleraugu og fleira og fleira og fleira.

Myndirnar eru fengnar af heimasíðu Belís heilsuvara, http://www.belis.is/, fyrir þá sem vilja skoða vöruúrvalið og e.t.v. festa kaup á þessum frábæru vörum.

kv. Helga...svífur um á bleiku skýi

....sól og stillt, en skítakuldi

Fjölmenningarlegt samfélag á Hvanneyri

2007-09-25T15:17:00.000+02:00

Sit hér í makindum mínum á ,,skrifstofunni" í gamla skóla og reyni að hripa niður einhvern texta af ,,viti" í verkefni í vísindaheimspeki. Allt í einu heyri ég þetta líka svaka gól og rýk að sjálfsögðu út í glugga og þarna stendur hvorki meira né minna en maður af erlendu bergi brotinn sem blæs sitt allra besta á sekkjápípu og á þess á milli í roknasamræðum við Steinunni bókasafnsvörð (já hún er við eftir hádegið).........ég segi það sama og Axel.....Hver er hann, hver á hann og hvaðan kom hann? Flestu átti ég nú von á en ekki þessu....
PS. nú eru liðnar svona 10-15 mín og hann er ekki að fara að hætta held ég. Ég fer nú út og tek í hann fljótlega ef hann fer ekki að hætta...OMG

Kveðja
Helga María, aldeilis hissa
Sólskin og ágætisveður

Gúmmískór voru það heillin

2007-09-06T15:50:00.000+02:00

Undanfarið hefur legið þungt á mér sú staðreynd að gúmmískórnir mínir eru götóttir og eins og flestir vita er ákaflega erfitt að nálgast slíkan varning á haustmánuðum, vegna þess einfaldlega að gúmmískór flokkast undir vorvörur. Sá ég því fram á að þurfa að finna mér annan uppáhaldsskófatnað eða vera hundblaut í lappirnar í allan vetur.
En nú eru bjartir tímar framundan, vegna þess að ég fundið og fjárfest í nýju pari sem stendur nú gljáfægt í forstofunni. Ég er að hugsa um að prófa þá á eftir, er þó ekki viss um að ég tími því, því það rignir og ég gæti óhreinkað þá......sé til.

Þó er helst að frétta að Birta litla er hverfa og ég er að hugsa um að gefa henni kassann undan gúmmískónum, þannig að hún hafi öruggan samastað, svona rétt áður en hún hverfur úr hor.

Meira síðar

Helga himinlifandi

12°á celsíuskvarða og rigningarsuddi

Anó páver II

2007-09-05T18:41:00.001+02:00

Gott fólk

Ég finn strax mun...

átakið byrjaði í morgun ég er öll önnur. Ég finn kílóin renna af og hægðirnar ganga ljómandi.
Bráðum koma fyrir og eftir myndir.

kveðja Birta, hverfandi

(smá rigning, SA 4m/s. 12°c)

Anó páver

2007-09-03T18:57:00.000+02:00

Gott fólk

Líf mitt undanfarna daga hefur verið tiltölulega áfallalaust, strípihneigðin hefur ekki látið á sér kræla, ég hef ekki dottið á neitt eða sagt neitt stórkostlega vandræðalegt.

Reyndar er ég að fara að byrja á herbalife þar sem móðir mín fannst mér og faðir minn orðin helst til of mjúk. Reyndar er pabbi handleggsbrotinn og getur ekki mikið gert til að reyna á sig og á helst ekki að gera það þess vegna hefur aðeins bæst utan á hann að sumra mati (ekki mínu þó) en ég aftur á móti hef enga afsökun. Er búinn að vera í útivinnu í allt sumar (eða þannig) og ætti því með öllu að vera helköttuð og tönnuð, það hefur aðeins misfarist.

Þannig nú ertu betri tímar framundan...
Framtíðarspá
-léttast um 5-7 kg
-vera duglega að læra
-heilsu og námsátak í smá tíma
-verða fyrir vonbrigðum þegar stigið er á vog
-verða fyrir vonbrigðum þegar útkoma úr prófi kemur
-endurvekja átakið
-sjá engan árangur og fara afur í sama bjórþambs farið
-þyngjast enn frekar
-vera sama um kg og fagna mjúkum línum

kveðja
Birta símjúk á brauðið

(Rigning, S, 7m/s 11°c
Rok og rigning)

Nýtt met

2007-08-23T13:29:00.000+02:00

Gott fólk og Steingrímur

Ég er ótrúlega ánægð með allt fólkið sem er komið á Hvanneyri til að fræðast, þótt að það sé verið að hola því niður út um allt. Það er bara ekki laust við að ég hlakki til annað kvöld, en þá er fyrsta grillið. Alltaf gaman að sjá hvað fólki gerir af sér svo verð ég líka í því að smella nafni hvers og eins á miða og líma á viðkomandi þannig veit ég hverjir allir eru.

Að öðru þið vitað orðatiltækið ,,koma til dyranna eins og maður er klæddur" jahh ég gerði gott betur, sagan um þegar ég drap næstum póstinn er bara kid stuff miðað við þetta.

úff hér kemur það

Síðust helgi var ég að passa Megas (Chihuahua hundinn hennar Kollu) og allt í lagi með það, en litli pjakkur átti það til að gelta á þá sem voru eitthvað að brasa fram á gangi sem var dulítið hvimleitt þar sem það var fólk að flytja þar inn og sem sagt stanlaus umgangur.

Á laugardeginum var ég að koma úr sturtu og var bara ein heima, dregið fyrir þannig að ég ákvað bara að bera á mig krem finna til föt í rólegheitunum, svona eins og maður gerir, nema hvað að þegar ég er inn í herbergi byrjar litli að góla alveg svakalega. Ég garga eitthvað á hann um að hætta þessu og annað slíkt þangað til að ég gefst upp og stekk fram til að fá hann til að hætta.

En obb obb hvað er á ganginum.... LÁRUS HÚSVÖRÐUR er kominn inn á mitt gólf og þetta hræðilega, hræðilega augnablik sem við stöndum beint á móti hvert öðru með skelfingarsvip þar sem ég er ÁN KLÆÐA fyrir utan handklæði um hausinn virtist vera sem heil eilífð. Þetta var alveg svona Matrix dæmi allt var í sló mósjón og heimurinn stöðvaðist mér til mikillar skelfingar.

Ég áttaði mig loksins og stökk inn í herbergi og gróf mig undir sængina og bara NEI NEI NEI NEI NEI NEI!!!!! mér fannst ég vera óhrein, skemmd og opinberuð. Hvað sem það var sem var verið að refsa mér fyrir þá er ég svo sannarlega búin að taka út mína refsingu jafnvel líka fyrir tilvonandi syndir.

Það versta er samt að ég þarf að hafa samskipti við Lárus í framtíðinni en ég stefni á að hunsa það þangað til að það hverfi og gleymist.

Lifið vel
Birta berrössuð

(skúrir SA 8m/s. 13°c)

Upprisa

2007-08-21T17:04:00.000+02:00

Gott fólk

Ég lifi enn og er full áhuga og lífsþrótti. I´m exited about my life eins og doktor Fill segir.

Núna eru tímar skipulags og ákveðni teknir við, ég er búin að vera að plana þetta blessaða skemmtanalíf og það gengur alveg ágætlega fyrir utan smávæginlega hnökra sem eflaust eiga eftir að leysast. Ég hlakka a.m.k. til að fá drenginga mína mér til halds og traust, þá verður allt betra. Fyrsta grillið verður á föstudaginn og vonandi koma sem flestir því þetta er nauðsynlegt til að sjá öll nýju andlitin það verður líklega í eitt af fáum skiptum sem við fáum að sjá nýnemana þar sem við erum alltaf á Bút. Það er fínt í sjálfum sér en maður fer á mis við að skoða hitt fólkið.

Talandi um Bút þá fórum við Mæja í fyrsta tímann þangað í dag með Magga B. En við vorum aðeins tvær að þessu sinni þar sem bekkjarfélagar okkar eru ennþá að vinna en koma innan tíðar.
Maggi var að tala um að fara í ferð þann 28. september þá annað hvort á Norður- eða Suðurlandið. Ég vona að við förum norður þá get ég verið eftir því að Laufskálarétt er þá helgi og ætla ég að leggja mitt af mörkum við að láta verða af því. Enda svo mikið hægt að skoða af skrítnum Norðlendingum og þeirra háttum

Þar til síðar
Birta upprisin

(Rigning, SA 6 m/s, 12°c. Gott fyrir gróðurinn, þó flestir séu búnir að slá)

Takk fyrir samveruna....

2007-08-16T18:25:00.000+02:00

Gótt fólk

Ég vil bara þakka ykkur fyrir samveruna, þetta er búið að vera ánægjulegt en nú held ég að ég láti lífið. Oft hefur það verið slæmt en nú er nauðsyn. Hver leyfði endurtektarpróf og hvað þá að hafa þau áður en skólinn byrjar. Það er ekki nóg að kennsla hefst þann 20. ágúst heldur eru prófin fyrir þann tíma (eða í mínu tilfelli þann 20.) Hva? sumarið er þá góðar 5 vikur eða eitthvað álíka fáranlegt.

Nú sit ég inni að hamast við það að lesa og það er prýðisveður úti, aldrei langar manni meira út en þegar má það ekki. Á milli lestra tarna fæ ég stressköst yfir því að útskrifast ekki í vor því ég er dulítið á eftir bekkjarfélögum mínum og síðan þess á milli fæ ég stressflog yfir skemmtanahaldi LBHÍ sem ég er búin að flækja mér inní. Sem betur fer er ég með tveimur góðum piltum sem eru í klípunni með mér, ef þeir væru ekki þá væri ég líklega látin nú þegar.

Annars er sumarið búið að vera ágætt, gott veður þó að ég hafi ekki fengið að njóta þess þar sem ég var að vinna innandyra þegar öll sólin var. Við fórum á FM og fór Gullberastaðaliðið í hestaferð í 3 daga. Verslunarmannahelgin var haldin hátíðleg í Þingeyjasýslu með Vöðva Valla.

Hef kannski samband síðar að handan
lifið vel
Birta fer yfirum og kemur að handan

(Norðan 4 m/s, 14° hiti, léttskýjað)

Eftir sumarfrí

2007-07-04T22:11:00.000+02:00

Sælir lesendur góðir....
Eftir margar erfiðar vinnuvikur ákváðum við að lyfta okkur aðeins upp með ferð á fjórðungsmót á Austurlandi.
Lagt var af stað snemma á föstudagsmorgni við mikla lukku ferðalanga. Mikið kapp var lagt á að geta kælt bjór alla helgina, þannig að fyrsta stopp var í Jökulsárlóni, þar sem var veiddur upp góður ísklumpur sem erlendir ferðalangar voru að enda við að ljósmynda, honum grýtt í stóran stein nokkrum sinnum þar til hann passaði í þar til gert kælibox og þar með var bjórkælingarvandamálið leyst. Að vísu mátti sjá undrunarsvip á útlendingunum og jafnvel tár á hvarmi, en bjórinn var kældur.
Við sýndum prúðmannlega framkomu, drukkum hóflega, vorum ekki með ólæti í brekkunni og hlógum að engum skrítnum........OMG talandi um skrítið fólk, við sáum eitt það allra skrítnasta, ljótasta og jafnframt hamingjusamasta par sem við höfðum séð. Það var eins og þau hefðu verið fryst á hápunkti 80´s tímabilsins og verið afþýdd á laugardagskvöldið. Rauðar gallabuxur, mokkasíur, mittisjakkar, axlapúðar og bara allur pakkinn (nema að allir Austfirðingar sé á þessu tímaskeiði). VÁ tvímælalaust hápunktur helgarinnar. Fuglinn og frú stóðu upp úr!!

kveðja Birta og Helga smiðir (eins og Sússi)
Sólskin og blíðviðri (líkt og síðustu vikur...)

Gríðarleg stemmning

2007-04-22T15:52:00.000+02:00

Sælt veri fólkið
Birta litla fór með fríðu föruneyti í Skagafjörðinn um helgina á Tekið til kostanna.
Ég gat ekki farið með enda er ég á síðustu metrunum í þessu lokaverkefni og jafnframt á síðustu metrunum í þolinmæði og geðheilsu. Þetta er nú ljóta vitleysan og bjáninn ég sem er farin að reyta hár mitt yfir 5 eininga lokaverkefni en er jafnframt búin að fá MS lokaverkefni þar sem er lokaverkefnið er 15 einingar. Það er lesendur góðir ÞRISVAR sinnum meira. Þá held ég að mennirnir í hvítu sloppunum verði búinir að ná í mig og bera mig út froðufellandi í spennitreyju áður en því helvíti lýkur.
....gott þetta Helga.

Stuðkveðjur
Helga María, skjálfhent af kaffi- og tóbaksneyslu
SSA, 8,5°á celsius og prýðisveður

Sumarvinna... hvað skal gera??

2007-04-16T15:08:00.000+02:00

sælt veri fólkið

Nú er ég orðin töluvert spennt fyrir sumrinu og langar mest til þess að drífa þessi próf frá svo maður geti farið að gera eitthvað af viti, eins og vinna. Reyndar er það eitthvað á reiki hvað ég ætla mér að gera en það er eitthvað í boði.

Eftirfarandi er í boði...

Vinna hjá Hilmari
+ skemmtileg vinna og fjölbreytt og góð laun
- er í höfuðborginni, auka húsaleiga og almennt meiri neysla
Vinna hjá Pétri smið
+ er á Hvanneyri
- hann er ekki búinn að svara mér hvort hann þarfnist starfskrafta mína
Vinna við að elda ofan í vegakalla
+ vel borgað og eyði engu
- er á fjöllum með 30 köllum með annan hvern sunnudag frían

Nú er úr vöndu að ráða og er ég í talsverðri sálarangist þess vegna, leggst undir feld og kem með lausn allra mína mála undan honum.. vantar bara að vita hvar maður nálgast þess lags feld.

Birta ljósvetningagoði
(NA 5 m/s, 3°C. hálfskýjað)

Brúðkaup og fleira spennandi

2007-04-02T16:40:00.000+02:00

Sælir lesendur góðir
Margt hefur á daga mína drifið síðan skrifað var á þessa síðu síðast. Á fimmtudag kynntum við lokaverkefnin okkar og það var alveg með eindæmum leiðinlegt enda er ég ekki mikið fyrir að sitja kyrr og hlusta lengi í einu og það sem verra er þá þurfti ég að tala og leyfa öðrum að hlusta og í því er ég sérlega léleg. Það var eiginlega verra að tala sjálf en hlusta, varð bara rauð í framan stamandi eins og fáviti innan um allt þetta sprenglærða fólk sem kom að hlusta á fróðleikinn sem rann uppúr okkur útskriftarnemum. Undarlegt, eins og ég hef nú annars gaman að því að tala og geri mikið að því.
Eftir þá niðurlægingu ákváðum við Svana að lyfta okkur aðeins upp með því að fara með hópi fólks að skafa skít af grindum í fjárhúsunum hjá honum Árna á Skarði, því hann er slæmur í baki og finnst gaman að fá fávita í heimsókn. Þar sem sóp hafði ekki verið brugðið á grindurnar í allan vetur var þetta nokkur mokstur en einnig þónokkurt gaman. Árni veitti vel af bjór og víni og eldaði meir að segja ofan í okkur. Ótrúlega klár hann Árni. Þegar mokstri var lokið ákváðum við á fara í sund í Brautartngu eins og svo oft áður. Eftir sundferð var svo haldið heim á leið á túttujeppanum hans Bjarna og haldið á barinn.
Á laugardaginn fórum við svo í brúðkaup Benna og Höllu. Það var mjög merkileg athöfn enda pússaði sjálfur alsherjagoði hjúin saman. Alsherjagoði var þó ekki jafn tilkomumikil sjón eins og ég bjóst við, skegglaus og tuldrandi ofan í bringuna á sér, svekkelesi. Svo fór hann meir að segja illa með vínið, sullaði þessu meir og minna niður. Síðan var veisla á Indriðastöðum, ball og allt saman og heilmikil gleði. Þegar við fórum heim fékk ég með mér eina 8 lítra af bollu úr brúðkaupinu til að viðhalda gleðskapnum og var það heilmikil sárabót fyrir að þurfa að kúldrast í skottinu á rollunni heim og það liggjandi ofan á sementspoka.
Jæja þetta er orðið gott....Bið ykkur vel að lifa

Helga María í syngjandi sveiflu
Blíðviðri, NA gola og 7,7°á selsíuskvarða

Helstu fréttir...

2007-03-26T15:27:00.000+02:00

Sæl verið þið...
Á föstudaginn var afmælisveisla á barnum. Tilefnið var tvöfalt 25 ára afmæli hjá Svönu og Guffu. Stemmningin var gríðarleg og ég held að flestir hafi náð ansi hreint góðu ölvunarstigi, enda var frítt vín fram eftir kveldi og eins og allir vita er voðinn vís þegar slíkt er í boði. Að minnsta kosti kom annað afmælisbarnið og nýjasti heimilsmeðlimurinn heim um hálf sjö um morgunun, pakksödd eftir sunnudagssteikina hans Steingríms. Ég fór ekki í party enda fór ég heim að ríða eins og allir ættu vita, a.m.k. þeir sem voru á opna deginum á Hesti og hittu Helga Hauk...
Það var gaman á opna deginum, nema það var allt of mikið af fólki, sérstaklega Helga Hauki og lítið um vín. Við eignuðumst fullt af fínu dóti og komum heim svoleiðis klyfjaðar af derhúfum og pennum...gott að eiga þetta.
Á sunnudaginn hélt ég mér heima að læra en Birta litla fór með Steingrími til Jóns á Kópareykjum að stinga út. Ég held það hafi verið gaman hjá þeim... framanaf hjá Birtu en gleðin bara jókst hjá Steingrími eftir því sem leið á kvöldið. En þetta var ágætt, allir komu þeir aftur og enginn þeirra dó...að minnsta kosti ekki fyrr en heim var komið.

Yfir og út....

Helga María

(Sólskin (eitthvað sem ég hélt ég sæi aldrei aftur) og 5°á selsíus)

Hjálp hefur borist

2007-03-19T14:23:00.000+01:00

Vííí

Mæja kom í heimsókn og hefur bjargað okkur enn á ný, við höfðum nefnilega lent í bobba varðandi að færa inn færslur á bloggið okkar og þar af leiðandi ekki getað skrifað neinn fróðleik ykkur til bóta.

Nú breytist... vei vei

Fróðleiksmoli dagsins...
,,Töff fólk slefar"

þessu komst Helga að er hún var að kenna mér að flauta með fingrunum og visst magn af munnvatni var leyst úr læðingi við þessar æfingar. þar sem Helga er svo gífurlega töff manneskja þá hlýtur það að vera þannig að töff fólk slefi.. er það ekki??

Ég get ekki flautað með fingrunum, þrátt fyrir góða kennslu, ég frussa bara og slefa um leið... en það er allt í lagi, því það er töff að slefa

Bið ykkur vel að lifa
Birta síslefandi

(Austan 3 m/s,-5 gráður, glampandi sól og snjór yfir öllu)

Afmælisvikan

2007-02-08T13:08:00.000+01:00

Sælt veri fólkið

Nú eru spennandi tímar, ég er að bjóða mig fram sem skemmtanastjóra LBHÍ og er það eina embættið sem er keppni um..

Nú reynir á alla vinina að sanna sig og arka á kjörstað til þess að greiða atkvæði, vonandi mér í hag þar sem þetta er nú afmælisvikan mín.

Á móti mér er ungur drengur á UMSK sem er nú ekki til þess að prýða hann:)

Annars er það að frétta að Búfjárræktarklúbburinn hefur ákveðið að fara í ferð mér til heiðurs þar sem ég á afmæli og fara að skoða í Húnavatnssýslu og Skagafirði alls kyns skepnuhíbýli og mannfólkið sem býr þarna fyrir norðan. Það verður eflaust ánægjulegt þar sem haldið verður af stað um hádegisbil á morgun í rútubifreið og heimferð er á sunnudaginn 11. febrúar (Þá á bekkjafélagi minn Axel Kárason fæðingarafmæli).

Ég hlakka óheyrilega mikið til ferðarinnar og stefni einmitt á Borgnarnesferð á eftir til að kaupa mér vökva þar sem ég vil ekki ofþorna.

Mig grunar að ég eigi eftir að bragða á honum í kvöld þar sem ég ætla að fá eitthvað að fólki yfir til mín eftir kosningaúrslit til þess að drekka mér til samlætis.

Nú er afmælisvikan hálfnuð og fer ég að vænta þess að pakkarnir fari að streyma inn frá þeim sem ekki eru nú þegar búinar að gefa mér. Mér finnst að allir ættu að taka sér til fyrirmyndar Bjarna og Valþór, sem búa fyrir ofan mig, en þeir félagar eru búnir að gefa mér gjöf fyrir fyrsta, annan og þriðja í afmæli og alltaf er það jafn gaman.

Ég kveð í bili og bið ykkur vel að lifa
Birta afmælisbarn

(NA 5 m/sek, -10°C, fínasta afmælisveður)

Þetta er búið...

2007-01-24T20:32:00.000+01:00

ég féll... í gær

...og mér er alveg sama

samantekt

2007-01-22T16:39:00.000+01:00

Sælt veri fólkið

Nú er allt búið að gerast, ég er búin að losna við leppinn og komin heim úr Hreðjarsferð. Við Helga erum enn að jafna okkur og það verður nú að segjast að fyrsta hugsun mín í morgun var ekki falleg... jahh og ég var ekki upp á mitt besta. Ég held að fegurðarklúturinn sé búinn að vera í hreinsum alla síðustu viku. En nú er ég búin að losna undan oki leppsins og fegurð mín fær að njóta sín að fullnustu vei vei..

Ég held að ég og Helga ætlum að taka því aðeins rólega í áfengisnotkun næstu daga og fyrir mína parta ætla ég að reyna að hemja mig í henni fram að þorrablóti, ég held að það sé góð hugmynd þar sem ég er ekki búin að vera að sinna skólanum sem skyldi og eitthvað sem heitit samviska er að narta í mig, ég kann ekki við það.

Kannski er þetta bara óráð og töflunar sem ég fann að tala, hefði ekki átt að borða þær allar í einu.

Birta fávís kona í ölæði
(ANA 3 m/sek, -6 gráður. skýjað og útlit fyrir snjókomu)

17.janúar

2007-01-17T14:22:00.000+01:00

Góðan afmælisdag kæru lesendur.
Jæja loks rann upp þessi langþráði dagur sem ég er búin að bíða eftir síðan á kvöldi 17.janúar í fyrra. Í tilefni dagsins ætla ég að vera með kjötsúpuveislu og er undirbúningur hennar kominn á fullt, Birta situr með sína litlu sjón á hægra auga og stóra leppinn fyrir því vinstra og er að skera rófur og gulrætur með STÓRA hnífnum, gott, gott (hver þarf að hafa 10 putta hvort eð er).
Ég er búin að fá þrjá pakka og fékk ég þá í gærkvöldi í æfingarafmælinu sem var í risinu í 12. Gullberastaðafjölskyldan gaf mér borð sem má bara geyma á bjór, gjöf sem ég geri ráð fyrir að verði mikið notuð. Unnsteinn gaf mér klósettleiðbeiningar sem eru stolnar af klósetti í Danmörku sem voru mjög skemmtilegar og fróðlegar. Óðinn gaf mér náttföt til að nota í Hreðjarsferðinni og samanstóðu þau af u.þ.b. meter af gegnsæjum borða, já Óðinn kann að gleðja.
Það eru svo skemmtilegir tímar framundan að ég á bara bágt með mig, ég á afmæli í dag, á föstudaginn förum við á þorrablót í Gnúpverjahrepp og um helgina förum við svo í ferð í Skaftártunguna með hrútavinafélaginu Hreðjari. Ég er alveg að farast úr spenningi....bjór bjór bjór. Svona reynir á að vera í háskóla úfff.
En þetta er orðið gott, ég ætla að fara að taka á móti afmæliskveðjum og stóru pökkunum sem bíða mín.
Þið munið svo að Dolly Parton á afmæli 19.janúar. Þeir sem vilja senda afmæliskveðjur geta örugglega farið á dollyworld.com og komið á framfæri afmæliskveðjum. Erfitt að þurfa að deila svona afmælisvikunni, en það slær aðeins á sársaukann að eyða henni með stórstjörnu á borð við Dolly.
Ég mun taka við afmæliskveðjum í gegnum síma, emil og á þessari síðu. En gjafirnar verðið þið að koma með sjálf og munið að ég met vini mína eftir stærð og verðmæti gjafa :)
Kveðja Helga afmælisbarn
-7°á celsíuskvarða, stillt og fínasta afmælisveður.

Hor og slef á nýju ári...

2007-01-08T16:32:00.000+01:00

Gleðilegt nýtt ár kæru lesendur og takk fyrir ánægjulegar samverustundir á árinu (taki það til sín sem eiga). Ég sit hér með hor í nös og kaffibolla og vorkenni sjálfri mér. Ég byrjaði nefninlega árið svo glæsilega með því að krækja mér í einhverja helvítis pest, sem er búin að vera að angra mig síðan fyrir helgi.
En ekki örvænta kæru lesendur, því þetta hefur hvorki komið niður á áfengis- né tóbaksnotkun, sem er líka eins gott, því annars væri ég líklega búin að stytta mér aldur, en gæti jafnvel orsakað líka hvað pestin hefur tollað lengi í mér, nei, nei ég bulla bara. Vískí og íslenskt tóbak er albesta lausnin til að ná úr sér hverskyns pestum sem kunna að herja á mann, þar hafið þið það.
Ég nenni ekki að vera að gera einhvern helvítis áramótanannál, segja hvað á daga mína hefur drifið o.s.frv, því þið vitið það jafn vel og ég að það hefur andskotans ekkert gerst merkilegt utan við almenna drykkju og fylleríisröfl vítt og breitt um landið og ég væri eingöngu að gera upp á milli fólks með því að vera tína einhver minningarbrot fram en gleyma öðrum og valda fólki sárindum. Í stað þess ætla ég að setja nýja slæðusýningu (slideshow)hér til hliðar með nokkrum vel völdum stundum á nýafstöðnu ári.
(ps. ég held ég sé að verða gömul, farin að bíða eftir að skólinn byrji og hið daglega líf fari að komast í fastar skorður)
Kveðja
Helga sólskinsgeisli
-6° á celsíuskvarða, stillt og fínasta veður

hó hó hó

2006-12-28T19:02:00.000+01:00

Sælt veri fólkið og gleðileg jól

Það sem af er jólum er búið að ganga prýðilega, allir saddir og sælir nema ég held að einhverjir hafi misskilið eindregna ósk mína um margar, stórar og dýrar jólagjafir. En það sleppur þar sem það er ekki langt í afmælið mitt... allir eru að safna er það ekki??

Annars var nóttin slæm, uppköst og læti sem er ekkert svo gaman, og almenn slappleiki í dag sem er heldur ekki gaman. Málið er bara að hressa sig við fyrir áramótin því ekki vill maður eyða þeim með postulíninu sem ég er þó orðin skuggalega náin, minn traustasti vinur í dag. Takk gustafsberg, þú ert æði!!

Birta ælir til þess að verða mjó
(Austan 7 m/sek hiti 8 gráður, leiðindar veður)

Loksins er ég...

2006-12-23T19:14:00.000+01:00

Loksins er ég....
..Búin að kaupa allar jólagjafir (ég vandaði mig lítið)
..komin hein úr Reykjavíkinni, var að vinna
..búin að fá mér 3 bjóra og ætla ekki að hætta þar því ég á þá skilið
..leita að borði fyrir mömmu í IKEA sem ég vissi ekki hvernig leit út, en síðan var það ekki til í réttum lit
..búin að ákveða hvað ég ætla að gera um áramótin: almenn ofurölvun
..búin að pakka inn gjöfunum
..búin með 4 bjóra og er ekki enn hætt
..búin að plana DK ferð í mars til að hitta Evu Lind og Ragga
..búin að koma mér í jólaskap
..búin að blogga í dag

Til hamingju með jólin
Birta afreksmanneskja
(ANA 3 m/sek, 4 gráður, ekki jólaveður)

Hugsa minn gang..

2006-12-16T11:47:00.000+01:00

Góðan dag (ef góðan skyldi kalla)

ég er komin að tímamótum í lífi mínu, ég held að ég sé að verða/orðin nörd.
Það er eitthvað sem segir mér að ég sé aðeins að missa kúlið þar sem ég sit EIN í tölvustofu skólans á laugardagsMORGNI og er að læra í dýrafræði hryggleysingja... (já gott fólk það eru ormar og fleira ógeð).
Það leiðinlega er að til þess að læra í dag hafnaði ég skemmtun í gær...

Mér finnst ég vera óhrein...

Birta farin yfir til óvinarins
(Austan 2 m/sek, -10 gráður)

17 kaplar

2006-12-14T19:46:00.000+01:00

Sælt veri fólkið
Nú er eitthvað liðið á prófin og ennþá er ég ekki búin að detta í lædómsgírinn eins og ég hélt að ég myndi gera. Ég er samt búin að læra aðeins betur textana hennar Dolly Rebeccu Parton því að sá diskur er aðeins búinn að fá að rúlla og hann er, gott fólk, algör snilld!!! Nýja uppáhaldslagið mitt er núna ,,Apple Jack" eða ,,Epla Jón" eins og það myndi útleggjast á ylhýra.

Jónína hringdi í mig í dag, hún var í Prag, í svakalegri stórri H&M búð. Hún var alveg viss um það að Íslendingar væri með apa í því að velja vörur sem kæmu til Íslands því þetta var víst svakalega fínt, annar en horbjóðurinn sem er hér í boði. Jafnframt var hún viss um að Tékkar væru litblindir þar sem þeir voru víst ekkert að nýta sér þessu fínu búðir sem hún var búin að finna.
Já þeir eru kjánar Tékkarnir, sjáum bara júróvisjón lögin sem þeir senda. Þarf að segja meir?

Jæja er ekki best að fara leggja svona 17 kapla til þess að þurfa ekki að læra...

Birta Dollyfan #1
(P.S. það er til himneskur staður í BNA... Dollywood)

(2 m/sek, -8 gráður, kalt en stillt, norðurljós)

Stutt í próf

2006-12-09T16:50:00.000+01:00

Sælt veri fólkið

Við Helga og Einar Kári erum ekkert búin að gera í dag, og vera í sófanum og stólunum til skiptis annað hvort sitjandi, liggjandi eða hálfliggjandi, þetta er ekki falleg sjón. það er byrjað að dimma aftur og við erum nú ekki búin að afreka mikið, ekki neitt.

Helga situr með glósurnar sínar í fanginu til þess að friða samviskuna en ég veit betur og er með ekkert í höndunum, nenni ekki að blekkja mig á því að halda að ég læri eitthvað í dag.

Helga, Einar og Bjarni kynntust nýjum manni í gær, sem var sofandi, og Bjarni fékk aðeins að lána símann hans til þess að heyra í systur sinni.... Hún er í Boston, hún sagði allt gott.

Þangað til næst
(austan 7 m/sek, -1 gráða, kalt og ljótt veður)

Já, þá fauk í mig

2006-12-01T19:16:00.000+01:00

Einu sinni þegar ég var ung að árum langaði mig ægilega til að fara að æfa fimleika. Þetta vakti ekki mikinn fögnuð heima fyrir enda vissu þau allt um mína lipurð og fögru limaburði, en ég gaf mig ekki, kom þessu í gegn og hóf ferilinn glæsta.
Mér fannst mér ganga rosa vel, amma gaf mér meir að segja fimleikabol og ég æfði stíft fyrir vorsýninguna, sem nálgaðist óðfluga.
Konan sem þjáfaði okkur var ekki á sama máli og hringdi í þrígang heim og bað mömmu um að finna fyrir mig aðra íþrótt þar sem ég væri bæði hættuleg sjálfri mér og hinum krökkunum í fimleikunum. En mamma stoppaði mig ekki, enda fannst mér bara fáránlegt að vera að reyna að hrekja mig úr íþrótt sem ég var svona líka rosalega góð í.
Úr því að ég gafst ekki upp þá tók kerlingin sem þjáfaði okkur sig til og gerði eitt það allra ljótasta sem ég veit til að hafi verið gert 6 ára gömlu barni. Hún fann minn veikasta punkt; vorsýninguna sem ég ætlaði að rúlla upp og toppa á fimleikaferlinum.
Vorsýningin var með eitthvað svona náttúru/álfa/trölla þema og ég var búin að fá hlutverk sem blóm, í rosa flottum búning og allt saman. Nema það að á síðustu stundu breytti þjálfarinn um plan og ég átti að vera TRÖLL, ég sett í svartan ruslapoka, máluð svört í framan og með hárið allt út í loftið. Mér varð svo svakalega misboðið að ég rauk heim af sýningunni, sótbölvandi og brjáluð út í helvítis kerlinguna.
Ég fór aldrei aftur í fimleika....

Kveðja
Helga lipra
SV átt og hæglætisveður

Þetta er komið...

2006-11-29T17:51:00.000+01:00

Ég er komin með hugmynd....
ég er búin að finna leið til þess að meika það og lifa áhyggjulausu lífi það sem eftir er. Ég er búin að finna leið til þess að sameina mörg af mínum uppáhalds áhugamálum og fá laun fyrir það. Jafnvel verða heimsfræg og geta jafnvel séð fyrir fjölskyldu minni og vinum jafnvel líka (ef þeir eru góðir við mig það er að segja.

Ég ætla að gerast skáld!!!!

-Það er mitt plan, þá get ég verið full alla daga í hugmyndavinnu og ef einhver fer að setja út á það við mig verð ég brjáluð og fer í tilfinningalega krísu út af því allir eru að reyna að hefta mína gáfu og skilja mig ekki.
-Ég þarf ekki að vinna frekar en ég vil að því að ég er að reyna láta skáldagyðjuna koma yfir mig, og svona smáborgaraleg hegðun eins og að vinna er ekki til þess að lokka hana að mér.
-Ég get prófað önnur fíkniefni til þess að víkka sjóndeildarhringinn og skynja aðrar víddir við skrif mín.
-Ef enginn skilur hvað ég er að skrifa eða segja geta ég alltaf sagt vera á undan minni samtíð og einstaklingar á þessum tíma eru ekki á sama þróunarstigi og ég og hafa því ekki þroska og gáfur til þess að skilja verk mín.

Já gott fólk nú er þetta komið, búin að redda þessu... ég er seif

Bið ykkur vel að lifa
Birta, talandi skáld

(NNA 4 m/sek, 2 gráður á celsíus, prýðis veður)

Sannur jólaandi

2006-11-22T21:06:00.000+01:00

Sælt veri fólkið

Fyrst að jólin nálgast óðfluga og hinn sanni jólaandi á eftir að hellast yfir allt og alli í formi vægrar geðveilu sem virðist hrjá svona.... humm 99% landans. En hvað um það þá er þessi geðveila ekki aðeins eitthvað sem einkennir Íslendinga því ég hef orðið var við þetta erlendis, nánar tiltekið í mínu móðurlandi.

Það var þannig nefnilega að ein jólin ákváðum við að vera í Noregi, til þess að sjá hverning upprunalegu Íslendingarnir gerðu það. Það gekk svo sem slysalaust fyrir sig nema eitt atvik sem ég man alveg sérstaklega, það felur í sér ömmu og marsipangrís.

Það er nefnilega einhver lenska þar, svo sem eins og hér, að hafa svona einskonar möndlugjöf. Sem væri svo sem ekki frásögufærandi nema fyrir það að ég hlaut hnossið og viti menn fékk þennan fína marsipangrís í verðlaun. Þarna sat ég með með móðurfjölskudu minni, móður og systrum í mestu makindum hæst ánægð með að hafa unnið verðlaunin þar til hún amma mín kær færðist nær mér og hrifsaði að mér grísinn og beit af honum hausinn....

Hvað á maður að gera? Óharnaður unglingurinn...

Ég er nú ekki að segja að þetta var eitthvað hræðilegt (ber ör fyrir lífstíð) en þetta dettur mér í hug alltaf stöku sinnum svona í kringum hátíðarnar.

Kveðja Birta jólagrís
(Austan þrír m/sek, 2 gráður á celsius)

Á barmi heimsfrægðar

2006-11-15T19:10:00.000+01:00

Sælt veri fólkið

Við vorum nokkur saman að vinna að skemmtiatriði fyrir árshátíðina sem verður næstkomandi laugardag. Búvísindi fyrtsta, annað og þriðja ár erum saman með eitt atriði og miðað við hvað við erum búin að skemmta okkur vel þá hlýtur það bara að verða fyndið. Við munum að minnsta kosti hlægja okkur máttlaus á meðan þau verða sýnd.

En það er búið að skamma mig svo mikið fyrir að kjafta frá eða næstum því kjafta frá þannig ég held að það sé best að segja sem minnst og biðja ykkur bara vel að lifa

Kveðja Birta fetar stjörnuslóð
(ASA 4 m/sek -9 gráður á celsíus)

Frekar stirð

2006-11-11T13:12:00.000+01:00

Sæl veri fólkið
í gær var Hrútavinafélagið Hreðjar að borga skuld sína við Jón á Kópa. En við keyptum af honum Lundason sem ber nú nafnið Hreðjar IV, og mun hann verða boðinn upp næstkomandi föstudag.

Við borguðum fyrir hrútinn með skítamokstri og því verður ekki neitað að ég finn aðeins örla á stirðleika í skrokknum, en það er örugglega ekkert á við Svein sem var með okkur og var í keppni um að moka sem hraðast, og já hann vann alveg þá keppni.

Það er samt ekki laust við að manni er farið að hlakka til atburðarins á föstudaginn, það verður eflaust fróðlegt að vita hver verður stærsti hluthafi af Hreðjari.

Hvet sem flesta nær og fjær til þess að mæta á þennan merka atburð.

Bið ykkur vel að lifa
Birta í djúpum skít

(-2 gráður, logn, hálfskýjað)

Stundir sem vekja ekki stolt mitt

2006-11-01T12:28:00.000+01:00

Það eru nokkrar stundir í lífi mínu sem ég er ekki sérstaklega stolt af...
-fermingargreiðslan mín
-öll gleraugu sem ég hef borið fram til 18 ára aldurs
-ýmsir drengir sem voru myndarlegir í skjóli nætur og ég var að reyna vera töff án gleraugna

og síðast en ekki síst föstudagskvöldið á fjórðungsmóti.

Þetta byrjaði vel og líkt og öll önnur gleði á hestamótum var grill um kvöldið, söngur og vín. Síðan var haldið á ball þar sem Geirmundur spilaði og söng en síðan fara málin aðeins að flækjast og man ég ekki mikið meira eftir mér þangað til um morguninn eftir að einhvert blessaða barnið var klínt á rúðu (og sá ég bara upp upp upp) og kallaði ,,AMMA! hver er eiginlega í bílnum þínum?"

Ég get svarið það þetta var ein versta setning sem ég hef bara upplifað, ég lokaði augunum og vonaði það allra, allra besta. En allt kom fyrir ekki og það var staðreynd, ég var ekki í tjaldinu mínu!!

Hvað gerir maður þá?
ég valt út úr bílnum sem reyndist vera þessi forláta Lada, hvít að lit, sem einhver amma átti og hafði lofað mér að sofa úr mér þegar hún sá einhverja hrúgu liggjandi í bílnum sínum. Ekki nóg með það að ég hafði sofnað í Lödu þá var hún akkurat á hinum endanum á tjaldsvæðinu og ég var ekki í neinum skóm.

Hvað gerir maður þá?
Nú auðvitað smellti ég bara lopavettlingunum mínum á fæturnar, því ég hafði náð að halda í þá einhverra hluta vegna, og byrjði að arka af stað, eftir að hafa þakkað fyrir gistinguna, þvert yfir allt svæðið svo örugglega allir gætu nú séð eymdina sem virtist loða við mig.

Ég get með sanni sagt að þetta var ein af mínum ömurlegust stundum í lífinu og næstum því ein af þeim sem maður sver af sér vín. En sem betur fer var ég ekki alveg með óráði og hélt sönsun, því þegar allt kemur til alls, eins og maðurinn sagði ,,það sem maður man ekki... GERÐIST EKKI!!"

Kveðja Birta í hæðum og lægðum
(Austan fjórir, fjórar gráður á celsíus, skýjað)

Íslenskur fréttaflutningur

2006-10-26T22:06:00.000+02:00

Fá gefins vél
Hólmvíkingar fá gefins vél í skólabíl sveitarfélagsins sem notaður hefur verið fyrir akstur úr Djúpinu.

Dísilvél bílsins er ónýt eftir aðeins 135 þúsund kílómetra akstur sem þykir afspyrnu léleg ending fyrir þess konar vél, eins og segir í fundargerð sveitarstjórnarinnar.

„En sem betur fer ætlar umboð Ingvars Helgasonar að láta okkur fá nýja, strípaða vél okkur að kostnaðarlausu og benti auk þess á verkstæði sem var tilbúið að setja nýju vélina í fyrir 120 þúsund krónur," segir í fundargerðinni.

Um er að ræða mikið breyttan bíl.

Stolið af fréttavef vísis

Kveðja Helga María
SSA-átt, 4,5 á celsíuskvarða

Góðar gjafir

2006-10-25T20:55:00.000+02:00

Ástkærir foreldrar mínir eru nýkomin heim úr hálfsmánaðar dvöl frá henni Ameríku. Þannig er nefninlega mál með vexti að systir hennar ömmu býr þarna vesturfrá og foreldrar mínir sáu hjá sér mikla þörf að heilsa uppá þá gömlu (svona meðan hún er vel heilsuhraust). Þó skal tekið fram að systirin var ekki í ,,ástandinu" eins og svo mörg ungmeyin á stríðsárunum, heldur flutti hún bara til útlanda með manninum sínum honum Jóni.
Nema það að mömmu minni þykir alveg hreint ægilega gaman að versla í útlönum, enda er hún svo sannfærð um að hvergi sé hægt að gera betri kaup en ákkúrat í því landi sem hún er stödd í þá og þegar og gjafirnar eru margvíslegar eftir því. Hvað á ég sem dæmi að gera við handtöskur, pils, naglasnyrtisett, perlufestar og þar fram eftir götunum? Þið sem þekkið til mín vitið að það er nákvæmlega ekkert af þessu notað og reynt að fela þetta við hvert tækifæri, þannig ég held að sparnaður móður minnar fari að mestu leyti fyrir ofan garð og neðan.
Talandi um mömmu mína, þá held ég að það fyrirfinnist ekki kona af hennar kynslóð sem býr yfir lélegri enskukunnáttu. Og notar hana óspart. Ég bað hana um að kaupa fyrir mig eina teiknimynd (Over the hedge, já verið bara abbó). Mamma mín fór búð úr búð að leita að myndinni en hvergi fannst ræman. En svo kom að því, síðasta daginn sem þau voru í Ameríkunni, þá er frúin að fletta einhverjum auglýsingableðli og hvað haldiði, myndin fræga á spottprís og tuskudýr sem fylgir með. Nema það að frúin lætur nú ekki segja sér þetta tvisvar, rífur auglýsinguna úr blaðinu og straujar af stað með pabba í eftirdragi og auglýsinguna í veskinu. Verslunin góða opnaði ekki fyrr en 12 á hádegi að staðartíma, þannig mamma hékk á húninum þangað til að stelpuræfill opnaði fyrir henni. Þá hefur frúin upp raust sína og otar auglýsingunni að stelpunni: Í vúld læk tú hef ðis piktjur and ði animal viðð itt. Stelpan skilur að sjálfsögðu ekkert hvað er um að vera en mamma gefst ekki upp og patar, potar og útskýrir af öllum lífsins sálarkrafti hvað hana vanti. Að lokum fékk mamma myndina í hendurnar var á leið út úr búðinni, þá mundi hún eftir helvítis tuskudýrinu og snéri við í dyrunum og hélt aðra ræðu yfir stelpunni og kom út skömmu síðar, sigri hrósandi með tuskudýrið. Mamma mín er æði, hvað er annað hægt að segja.
Ég er líka nokkuð viss um að enginn annar en mamma mín hefur heldur keypt brjóstahaldara á allan kvenpeninginn í fjölskyldunni á dántán prís.

Kveðja Helga María, glöð með gjöfina góðu frá Ameríku
NA-átt, 6,6 m/sek og 1,3° á selsíuskvarða

Rosa full

2006-10-19T03:23:00.000+02:00

Dagur 3 frá próflokum, ég er aveleg djöfull góð í löppini og hinu , takk fyrir það.
over and out
Helga, Egill og Bita

Blind blekaðar

2006-10-19T03:15:00.000+02:00

Gott kvöld góðir hálsar...

Nú er búið að setja á flöskur... og þær voru nokkuð margar eða um 40 stykki plús ein tveggja lítra!! Nokkuð gott
Vorum ánægðar með dagverkið og eftir kannski rúmlega viku eða aðeins meira þá verður góður gleðskapur, kannski jafnvel líka opnun, opinber, á heimasíðuna.

En sitjum nú hér að drykkju, og nokkur eru komin fram úr öðrum á því sviði, en gaman verður að vita hvernig kvöldið endar. Það er bara greinilegt hverjir eru búnir með próf og hverjir ekki....

En þangað til síðar
Kveðja Birta og Helga

(Logn, nánast heiðskýrt, -1 celsíus)

Svindl, svindl, svindl

2006-10-15T14:24:00.000+02:00

Af hverju getur Birta alltaf fengið að gera allt sem hana langar til en ég er hér heima kvöld eftir kvöld að læra.
Ég er er nefninlega að fara í próf á morgun en Birta ekki, þannig hún er búin að fá að vera full alla helgina, vera með ólæti og almennt fylleríisröfl á meðan ég sit hér með tárin í augunum, lærdómsbækurnar í höndunum og að drepast því ég er svo djöfulli abbó.
Svo finnst mér endalaust verið að nudda mér uppúr þessu. Birta, Helgi Haukur og Einar Kári að koma hingað til að segja mér allt þetta ótrúlega magnaða sem gerst hefur undanfarnar nætur, eins og þegar Stonemask dó og var málaður, svo það nýjasta, hvað það gerðist margt skemmtilegt á Geirmundi. Ég hefði ekki viljað missa af því þegar Birta rauk uppá svið til að fá eiginhandaráritun frá honum ,,Geira sínum". En ég missti af því eins og öllu öðru skemmtilegu þessa dagana. Ég er að kafna ég er svo abbó.

Kveðja Helga, svo abbó
rigning, hiti 6,6°

Dægrastytting

2006-10-12T16:45:00.000+02:00

Sælt veri fólkið

Fyrst að allt annað en lærdómur virðist vera lífsnauðsynlegt að framkvæma ætla ég að segja ykkur nokkur stórmerkileg og bráðnauðsynleg orð.
Hvað er betra en að segja ykkur eitthvað frá æsku minni, endalaus uppspretta skemmtunar.
Ég og hjól eigum ekki svo vel saman, ég held að ég sé með bara einhvern vatnsleka í eyranu sem veldur því að mitt jafnvægislyn er ekki til staðar. Eða kannski er það vegna þess að ég sá ekkert mína fyrstu 18 mánuði og hafði því ekki möguleika á því að þróa jafnvægið á við hin heilbrigðu börnin.
Hvað sem það er þá veldur það því að ég er frekar völt svona og samhæfing hugar og handar er ekki alltaf sem skyldi.
Ég man að þegar ég var aðeins yngri og ekki mikið minni þá fengum við systur hjól, það var mikill gleðidagur og spenningurinn í hámarki. Ég var náttúrulega æst í það að prófa fákinn, en málið var það að foreldrar mínir ákváðu að vera forsjálir og kaupa lítið eitt stærra hjól en ég þurfti á þeim tíma. Síðan gæti ég stækkað upp það.... já... stækkað (ég er nú reyndar alltaf að bíða eftir þeim vaxtarkipp).
Hvað með það þá rauk ég á hjólið og þeyttist af stað.
Fyrir þá sem þekkja til heima hjá mér þá er hlaðið í hring og síðan get ég beygt fyrir horn á slétt plan áður en afleggjarinn tekur við, sem er svolítið brattur.
Ég byrjaði að hjóla og hjóla og hjóla, allt gekk vel ég náði hringnum á hlaðinu og var komin á talsverða ferð þegar ég var að undirbúa mig undir það að beygja fyrir hornið... en obbobb... ég náði ekki alveg að stjórna stýrinu og NÁÐI ekki un bremsunar (því að mamma og pabbi höfðu keyrt hjól sem ég myndi vaxa upp í!!) og ég þaut niður afleggjarann.
Ég gerði það sem öllum 12 ára stelpum dettur í hug, ég garga.... læt pabba fá næstum því hjartaáfall og hann hleypur á eftir mér.
Ég reyndi að beygja hjólinu en allt kom fyrir ekki. ég endaði á túnhliðinu sem er beint á móti afleggjaranum. Klessti á túnhliðið, kippti því af, flaug af hjólinu beint í einhvert drullusvað, nokkrum metrum frá, með andlitið fyrst og á eftir mér kom fákurinn góði, með hliðdrusluna flækta í sér, beint á mig.
Í þessu kom faðir minn að athuga hvort að ég væri nú heil, sem ég var svo sem fyrir utan eina framtönn og brotið stolt.
Þetta var dagurinn sem ég ákvað að hjóla ekki mikið meira...
tour de france... þetta er bara hópur af spennufíklum

Birta á fljúgandi ferð

(hálfskýjað, 14 stig, austan 4, ágætisveður)

Gleðidagur

2006-10-10T00:38:00.000+02:00

Nú gerðist það gott fólk, dagurinn sem allir biðu eftir....
Við lögðum í bjór, loksins.
Við gerðum allt rétt, töluðum við gerið svo að það myndi vaxa og dafna, leika sér við sykurinn á kyngimagnaðan hátt og þessi tryllti dans gers og sykurs í leginum mun geta af sér ljúfan, svalandi, perlandi mjöð.
Við förum með Mæju sem okkar andlega stuðningsmann og leiðbeinandi á meðan við hræðum saman efnið, það var gaman.
Þetta er lífið, þetta er stundin sem við höfum beðið eftir, nú er ekkert eftir nema að bíða rólega, þó með tilhlökkun eftir að við megum fara að tappa á og njóta innan skamms... Bíðið bara, bíðið bara

Kveðja Birta og Helga

(suðvestan 5, súld, 6 gráður á celsíuskvarða)

Afrek dagsins

2006-10-09T00:58:00.000+02:00

Ég náði að gera eiginlega allt annað en að læra í dag, ég fór eftir að ég vaknaði á hrútasýningu Lunddælinga og Andkílinga kl. eitt og fór það vel fram. Allir voru óþægilega stilltir og kurteisir nema við mæðgur á Gullberastöðum, við náðum svolítið að halda uppi óreiðu og skrílslátum og gerðum við óspart grín af Skagfirðingum og þeim sem voru að dæma sem töluðu ekki allt of hátt.

Eftir að við höfðum verið á þessari sýningu, þar sem Hestmenn og Lunddælingar báru af öðrum keppendum, fór ég og reyndi að næra mig eitthvað áður en embættisstörf mín hófust. Þau fólu það í sér fara á þann fróma stað Kópareyki í Reykholtsdal og velja hrút til kynbóta á Syðstu-Fossum fyrir hönd Hrútavinafélagsins Hreðjars. Tókst það ágætlega og festum við kaup á Lundasyni sem lofaði góðu og var vænlegur til afreka.

Mikið meir gerðist ekki í dag fyrir utan almenna drykkju og ólæti.
Kveðja Birta ótrúlega ómissandi

(Dropar í lofti, norðaustan 3, hita 8 gráður á selsíuskvarða).

Hávísindaleg tilraun í fjósinu

2006-10-06T23:01:00.000+02:00

Í gær fór ég út í fjós þar sem mér var fyrirlagt að gera þar hávísindalega tilraun á atferli kvíga. Ég reyndi að finna mér réttan útbúnað en þar sem lítið fólk virðist ekki eiga að eiga nokkurt erindi í fjósið, þá endaði ég í galla nr. 54 og stígvélum nr.43. Þegar ég var kominn í búninginn fannst mér ég vera fær í flestan sjó (enda hefði ég getað tjaldað gallanum og farið í rafting í stígvélunum) og þrammaði inn í fjós. Ég valdi mér ,,algerlega tilviljanakennt" kvígu sem var nr 1004 og hóf tilraunina sem fólst í því að skrá á 5 mín. fresti hvað kvígan væri að gera og hversu oft hún framkvæmdi hvert atferli. Nema það að 1004 var bara þræl þroskaheft. Hún glápti á mig gersamlega stjörf fyrstu 5 mínúturnar (ég held reyndar að það hafi verið outfittið sem heillaði). Þegar hún var búin að glápa á mig fór hún að framkvæma afar afbrigðilegt atferli (stereotypes) eða svokallaðar ,,tungurúllur". Hún virtist vera búin að ná gríðarlegri leikni við þetta atferli, enda sýndi hún það stanslaust næstu 25 mín. þar á eftir og sleikti innréttingarnar inná milli. Hún gerði barasta ekkert annað, átti enga vini, engin samskipti við neinar aðrar kvígur og hreyfði sig ekkert, bara stóð eins og fáviti út í horni og velti tungunni uppí sér af mikilli innlifun. Sem betur fer var gefið þegar hálftími var liðinn af þessarri hávísindalegu tilraun minni svo ég gat stungið af og logið upp restinni af tilrauninni.
Það er einmitt á svona stundum sem maður fattar hvað háskólanám er mikilvægt og gott veganesti út í lífið
Ég mæli samt sem áður með því að þið gerið ykkur ferð út í fjós og skoðið 1004, hún er alveg rosalegur grínari!

Helga María
í hávísindalegum hugleiðingum.

( austan 5, hiti 3,5 gráður á celsíuskvaða )

Flestir geta fríkkað.

2006-10-05T22:00:00.000+02:00

Ég hef ekkert alltaf verið þurrkuð með fegurðarklútnum, eða verið í heppnispeysunni (reyndar er ég í henni ennþá held ég). Þetta er svolítið erfitt að vera svona eins og ég er í dag því ég veit hvernig það er að vera eins og þið hin.
Reyndar var þetta ekki mér að kenna framan af, ég var bara það óheppin að fæðast það góða ár 1985, þá var móðins að hafa gleraugu á stærð við 42´sjónvarp. Þau voru í raun það stór að jafnvægispunkturinn í mér raskaðist, sem var svolítið erfitt þar sem ég er og var ekkert hávaxin.
Stundum held ég samt að foreldrar mínir hafi notað gleraugun sem þau völdu mér sem refsitækni, og viti menn, það tókst.
Síðar (þegar ég kann það) ætla ég að láta myndir af mér og gleraugna safni mínu inn á þessa síðu og það verður rukkað inn.

Ein af mínum uppáhaldsmyndum er fermingarmyndin mín, en þá bara ég af...
Svört þykk gleraugu (sem reyndar er ekki hægt að kenna öðrum um en mér)
dragt (að því ég var að reyna vera öðruvísi, sem var ekki gott því mín líkamlega ásjóna sá alveg um það)
og síðast en ekki síst þá skartaði ég þessum forlátu teinum, bæði uppi og niðri.

Þannig að gott fólk og Helgi Haukur, sumum er bjargandi, haldið bara fast í trúnna allir fá sinn tíma til þess að blómstra, sjáið þið bara mig.

Birta, verðug fyrirmynd

(skýjað, hægt veður, 6 gráður)

Úti að aka

2006-10-04T23:29:00.000+02:00

Ég, Birta komst heil úr höfuðborginni þrátt fyrir að móðir mín kær keyrði alla leið að Holtgörðum, en venjulega hættir hún sér ekki á háskabrautir Reykjarvíkur, henni langaði endilega að prófa sem er ekkert besta hugmynd sem ég hef heyrt. Svo sem allt í lagi að hún æfi sig í að keyra bara ekki þegar ég sit í bílnum og er að reyna að segja henni að hún hafi alveg 2-3 metra til afnota hægra megin við bílinn, en nei nei
,,það er allt í lagi Birta mín" segir hún,
,,ég notar svo sjaldan stefnuljós þannig að það er best að vera á báðum akreinunum".
,,JÁ ER ÞAÐ!!" segi ég skelfingu lostin þegar enn einn trukkurinn mætir okkur með hvínandi flautuna alveg brjálaður. Eftir að hafa komið við í ríkinu og IKEA í Holtagörðum þá við ég vinsamlegast um að fá að aka bifreiðinni, því mig langi svo að prófa (ekki deyja). Það líður ekki hálf mínúta þangað til hún er farin að segja mér hvað Íslendingar séu algerlega snauðir allri umferðarmenningu og blótar þessum ,,dumme kerlingum" sem ætti víst ekki að hleypa út fyrir vöktuð svæði.... ég álít bestan þann kost að segja sem minnst á þessari stundu.
Ekki það að ég sé einhver frábær ökumaður, bara... ég veit til hvers hvítu strikin eru.

Lifið heil, Birta úti að aka

(Hæglætisveður, 5 gráður)

bloggedibloggbloggblogg

2006-10-03T14:41:00.000+02:00

Nú eruð þið loksins komin með samastað á netinu, þegar ykkur leiðist, eruð að vafra, eigið að vera að læra, halda partý eða langar einfaldlega í kjarngóða skemmtun og fróðleik.

Við, Helga María og Birta erum byrjaðar að blogga, hverjum datt það í hug (og já, þið sem voruð að veltast um í vafa þá kunnum við á tölvur).

Næsta skref er að finna út hvernig á að gera svona alls konar fítusa eins og bakgrunn og annað smálegt